TilbakeEai goassege ovdal leat eanet olbmot báhtaran soađis ja riidduin, ja eaige goassige ovdal leat ná oallugat dárbbašan veahki ruovttu dábuhit. Muhto lea doaivva, ja gávdnojit čovdosat. TV-akšuvdna 2026 galgá veahkehit ahte badjel 400 000 olbmo ožžot dorvvolet ja buoret orrundili Syrias, Gazas, Afghanistanas, Chadas, Sudanas ja DR Kongos.
48 miljovnna máná leat báhtareaddjit
Badjel 120 miljovnna olbmo leat dál báhtaran soađis, riidduin ja doarrideamis, ja dat lea duppalastin logi jagis. 40 proseantta sis leat mánát ja leat erenoamáš hearkkit gillát vára ja vaháguhttima.
Báhtareapmi mearkkaša leat gasku garra roasu. Eallin nu movt dovdá, nuppástuvvá áibbas. Olbmot geat bákkus šaddet báhtarit soađis ja riidduin eat dávjá massán ollu; máŋggas leat massán bearašlahtuid, barggu, oahpu ja iežaset sosiála fierpmádaga. Dávjá fertejit sii guođđit ruovttuset dušše dainna maid nagodit guoddit, dieđekeahttá sáhttetgo dahje goas sáhttet máhccat.
Ruoktu lea eanet go njeallje seainni ja dáhkki. Dat addá dorvvolašvuođa, suodjalusa ja báikki gosa gullá. Go bearrašiin ožžot orrunsaji, de šaddá maiddái álkit gávdnat barggu ja sáddet mánáid skuvlii. Dáinna lágiin sáhttá árgabeaivi dásáiduvvat, ja sáhttá hukset vuođu ođđa boahtteáigái.
Dán jagáš tv-akšuvnna ruđat mannet tealttáide ja eará heahtevisttiide, gaskaboddosaš ja bissovaš ruovttuide, čáhce- ja buhtisvuođaprošeavttaide, ja riekteveahkkái.
Dása mannet ruđat
Heahtevisttit: Olbmot geain lea fáhkkatlaš ásodatdárbu dahje geat dárbbašit veahki buoridit iežaset gaskaboddosaš ásodagaid, galget oažžut veahki mii gádju heakka. Dát sáhttá leat buot dego fállat tealttáid, presenegiid, báttiid, fielluid, madrássaid ja eará rusttegiid dassážii go bearrašiin lea vejolašvuohta dábuhit eanet bissovaš orrunsaji.
Gaskaboddosaš ruovttut: Bearrašat ožžot veahki buoridit ja divvut ja gaskaboddosaš ásodagaid, ja muhtin bearrašat galget oažžut doarjaga viessoláigui. Dasa lassin áigu Norgga Báhtareddjiidráđđi (NRC Flyktninghjelpen) hukset bilitkeahtes visttiid ođđasit ásodahkan.
Bissovaš ruovttut: Norgga báhtareddjiidráđđi (NRC Flyktninghjelpen) áigu divvut billahuvvan ásodagaid nu ahte eanet olbmot ožžot bissovaš ruovttuid. Dasa lassin divvojuvvojit almmolaš visttit, nu ahte olbmot besset máhccat ruovttubáikkiidasaset ja ožžot almmolaš bálvalusaid.
Čáhci ja buhtisvuohta: Norgga báhtareddjiidráđđi (NRC Flyktninghjelpen) áigu divvut ja ođđasit hukset osiid čáhcái ja buhtisvuhtii guoski infrastruktuvrra. Dáinna lágiin sáhttit mii ovttas ráhkadit buori ja dorvvolaš birrasa gos bearrašat ja mánát ožžot buhtis čázi ja buori buhtisvuođadili.
Riekteveahkki: Dáid stuorra billistemiid geažil lea deaŧalaš sihkkarastit vuoigatvuođa viesuide ja opmodagaide. Norgga báhtareddjiidráđđi (NRC Flyktninghjelpen) fállá diehtojuohkima ja riekteveahki sihkkarastin dihte ásodat- ja opmodatvuoigatvuođaid bearrašiidda mat máhccet ruoktot dahje ceggejit gaskaboddosaš orrunsaji.
Šatta ruhtačoaggin sotnabeaivve skábmamánu 18. beaivvi!
